الأربعاء، 24 فبراير 2010

مبارك VS البرادعى

صباح الخير أو مساؤه لأنى باكتب وقت ما اكتب و انت تقرا وقت ما تقرا ، أو ما تقراش و تبص للتدوينه باحتقار .. برضه انت حر .. بس مش حر أوى يعنى .. ماهو معنى الحريه متفاوت .. يعنى انت حر تاكل اللى تحبه .. دا لو معاك فلوس تاكل طبعا من الأساس .. و حر تتفرج على القناه اللى تختارها .. دا لو اصلا فى فرق بينهم .. و حر انك تختار المستشفى اللى تتعالج فيها .. بشرط تلاقى سرير فاضى طبعا .. و حر تلبس اللى على كيفك أو متلبسش برضه دا نوع من الحريه و ممكن تبقى بين البينين و تسيب الباب موارب .. يعنى مثلا تسقط البنطلون .. فتبقى كده لابس و مش لابس .. أو تلبسى بادى شورت ستوميك .. تبقى برضه عملتى تمويه .. محدش يبقى فاهم ان كنتى لابسه و لا لأ

كل دى نماذج لحاجات انا حر فيها .. بس يا ترى انا حر فى الانتخابات ؟؟ يعنى هل انا من حقى انتخب المرشح اللى انا عايزه .. يا سلام .. و نقعد كده زى الأمريكان نسمع برامج المرشحين و نسمع خطبهم فى الميادين .. يا حلاوه .. و يعملوا مناظره سوا على الهوا ( حلوه سوا على الهوا دى ؟؟ ) .. يا خبر دى تبقى هيصه .

أنا الصراحه واحد من الناس من ساعة ما اتولدت و انا عارف ان البلد دى ليها ريس واحد .. مبارك ربنا يطولنا فى عمره .. و بقالى على كده 23 سنه و مسستم دماغى على هذا الوضع .. فجأه يا اخويا و الاقيلك حاجه اسمها انتخابات و اقتراع مباشر و كلام فارغ كده .. لأ و الأفظع من كده ان فى مرشحين هيدخلوا أودام الريس

يا لهوى .. دى مصيبه سودا يا ولاد .. يعنى ايه ؟ يعنى لو المرشح دا كسب و العياذ بالله .. مايبقاش فى مبارك ؟؟ مانشوفش جمال و علاء فى المدرجات تانى ؟؟ طب دى تيجى ازاى يعنى ؟؟

و لو صدقتها .. يا ترى واحد زى البرادعى دا لو جه هيمشى وزير الداخليه اللى بقاله عمر لابد على قلوبنا ؟؟ و يا ترى هيغير وزير الدفاع و لو من باب كسر الملل ؟؟

يا ترى هيمشى غالى من وزارة الاقتصاد و يبعده عن المواطن الغلبان ؟؟ و يجيبلنا وزير إعلام كده حليوه و له فى الإعلام يعرف يرجع للتلفيزيون المصرى قيمته ؟؟

و يا سلام بقى لو جاب وزير تعليم يكون بيفهم لا قدر الله ؟؟ و يبطل يحفظنا المناهج .. و يقوم متمم جميله و يجيب وزير خارجيه يرفع راسنا اللى بقت فى التراب بين الغجر و رعاة الغنم .

بس لأ لأ لأ .. لا البرادعى و لا غيره .. حسنى مبارك مفيش غيره

قال البرادعى يبقى ريس قال .. و مين يلقى خطاب عيد العمال قبل العيد بإسبوع ؟؟ البرادعى ؟؟ لا و ألف لا .. و مين يأكد على إن العيب فى المواطن اللى عمال يطفى النور و يجيب فى عيال ؟؟ البرادعى برضه ؟؟ طب كمان لا و ألف لا .. و مين اللى هيأكد على ان الصحافه حره ما عدا إبراهيم عيسى و وائل الإبراشى طبعا ؟؟ البرادعى ؟؟ مش بالعها دى كمان

يا اخواننا لا غنى عن مبارك .. لا غنى عن هذا النظام .. ازاى هنفتح عينيناالصبح منلاقيش العادلى و غالى و طنطاوى و صفوت الشريف و غيرهم ؟

فليسقط البرادعى و أعوانه .. و لنحارب الخونه أعداء الوطن .. و لتذهب الانتخابات للجحيم

و لتحيا مصر مُزّه مستفزه